الحفيدـ يعنى إيه تبنى يا جدو؟!
الجدـ عايز تعرف ليه؟!
الحفيدـ أصل اصحابى اللى معايا فى الفصل بيقولوا إن مايكل ماهواش إبن عمو سمير..
الجدـ يعنى إيه؟!
الحفيدـ اصحابى بيقولوا إنه إبنه بالتبنى..
الجدـ طيب.. يعنى اصحابك أشطر منك وعارفين يعنى إيه هو التبنى!
الحفيدـ يا جدو دول بيقولوا كلام زي ما باباهم ومامتهم بيقولوه!
الجدـ عموما ياسيدى أفهمك.. لما ربنا سبحانه وتعالى مايرزقش أسرة بعيل يوجع دماغها زي حضرتك كده يقوموا يروحوا للملجأ ويطلبوا إن هم يتبنوا عيل ولد أو بنت يعنى ياخدوه ويربوه ويبقى زي ابنهم..
الحفيدـ طيب ويعنى إيه ملجأ؟!
الجدـ هو انت متبطلش أسئلة أبدا.. ياسيدى الملجأ ده مكان بتصرف عليه الجمعيات الخيرية يقوموا يربوا فيه الأطفال اللى ملهومش أهل لأن الحكومة شايلة إيدها من الحكاية دى!..
الحفيدـ ليه؟!.. أمال أهاليهم راحوا فين؟!
الجدـ دا انت باين يومك مش فايت.. ممكن يكون أهاليهم مش قادرين يتحملوا المسئولية..
الحفيدـ فقرا يعنى؟!
الجدـ بالضبط.. فقرا.. أو يكون الأب متوفى والأم عندها عيال كثير ومش قادره تصرف عليهم أو يكون الأب والأم كمان ميتين والأهل يا دوب عايشين.. أو...
الحفيدـ أو إيه يا جدو؟!
الجدـ هو انا قلت أو؟!
الحفيدـ أيوه يا جدو!
الجدـ طيب دى بلاش!
الحفيدـ ليه بس يا جدو!
الجدـ لما تكبر هاقول لك عليها!
الحفيدـ والنبى تقول يا جدو!
الجدـ يعنى الطفل يكون لقيط!
الحفيدـ مش فاهم!
الجدـ يعنى يلاقوه فى الشارع!
الحفيدـ ليه؟! أمال فين مامته وباباه؟!
الجدـ روح اسأل الجماعة بتوع الدى ان ايه!
الحفيدـ هو فيه جماعة اسمها دى ان ايه يا جدو؟!
الجدـ ما انا قلت لك مش هتفهم حاجة دى الوقت!.. من فضلك انزل الأجزاخانة اللى تحت واشترى لى دوا الضغط وأنبولات السكر..
الحفيدـ ياه!.. ميه وعشرين جنيه عشان دوايين؟!
الجدـ ودول بيكفونى عشرين يوم بس!
الحفيدـ دا احنا لسه فى نص الشهر يا جدو ومصروفك اللى بتاخدوا م الحكومة مش هيكفيك!
الجدـ طيب وهنعمل ايه؟!.. التأمين الصحى مافيهوش الدوا بتاعى!
الحفيدـ ما تخللى أونكل حكومة يتبناك يا جدو!
الجدـ أونكل حكومة بيحمدوا ربنا إن الإسلام مافيهوش تبنى!
الحفيدـ أقول لك نكتة يا جدو؟
الجدـ هو العيال اللى فى سنك ولسه قى ثانية ابتدائى بيعرفوا يقولوا نكت؟!
الحفيدـ يا جدو أنا خلاص فاضللى شهر واتم ثمن سنين!
الجدـ دا الواحد فى جيلنا يا ابنى كان عنده ثمان سنين ولسه بيرضع!
الحفيدـ خلاص بلاش اقول النكتة بأه!
الجدـ لأ يا خويا قول..
الحفيدـ واحد ما بيكفهوش مرتبه وقرب آخر الشهر وهو مفلس ع الآخر.. راح يفتش فى جيوب البنطلون بتاع ابنه قام التقى عشرة جنيه بحالها.. إبنه شافه وهو بيفتش فى جيوب بنطلونه قام قال له فيه حاجة يا بابا؟!.. قام باباه قال له: "دا انت اللى بابا وانت اللى ماما وانت اللى كل حاجة فى حياتى"!
الجدـ يخرب عقلك انتوا بتجيبوا الكلام دا منين؟!
الحفيدـ من المدرسة يا جدو!
الجدـ دى الوقت المدرسة بتعلم صحيح!.. ممكن بأه تقوم تعمل الواجب بتاعك..
الحفيدـ أوه.. يعنى لازم تفكرنى بالهم ياجدو؟!
الجدـ هي المذاكرة خلاص أصبحت هم؟!
الحفيدـ هو صحيح ياجدو اللى يذاكر كثير يبقى متخلف؟!
الجدـ يا نهارك مش فايت!.. مين يا ولد قال لك الكلام ده!
الحفيدـ هانى صاحبى..
الجدـ وقال لك إيه كمان؟!
الحفيدـ قال إن باباه متخلف عشان واخد الدكتوراة وعربيتهم كحيانه.. وأونكل عزت أبو منير صاحبى مامعهوش الإعدادية ولعبت البلية معاه وعنده بى ام آخر نزاكه!.. هو يعنى إيه لعبت البلية يا جدو؟!
الجدـ يا عينى يا عينى.. قول يا روح جدك.. قول!
الحفيدـ طيب انت ليه مش غنى ومعاك فلوس كثير يا جدو؟!
الجدـ عشان انا متخلف؟!
الحفيدـ معقول يا جدو تبقى انت متخلف؟!
الجدـ ما هو انا لو ما كنتش متخلف يمكن كانت البلية لعبت معايا زي أونكل عزت أبو صاحبك!
الحفيدـ ياريت يا جدو كانت بطنك واسعة ومانتاش نحيف كده!
الجدـ إيه دا يا ولد؟!.. إنت جبت المصطلح دا منين؟!
الحفيدـ هو انا قلت حاجة غلط يا جدو؟!
الجدـ إيه حكاية بطنه واسعة دى؟!
الحفيدـ أصل أونكل بابا ممدوح صاحبى بيقولوا عليه العيال فى الفصل إنه بطنه واسعة عشان مامته بتوصله فى نص السنة الأولانى بعربية إيه.. كده!.. ونص السنة الثانى فى عربية ثانية روشة!.. وكمان بيصيفوا فى مارينا!
الجدـ وأونكل بابا ممدوح صاحبك ده بيشتغل إيه؟!
الحفيدـ رئيس حي يا جدو!