إيوالله حلوه بالحلى مالك وصيف=شهدٍ له العالم تسيل أرياقها
مثل الخلاصه من عسل وادي المصيف=أعرف طعمها لوفمي ماذاقها
يافاتنه يهواكِ طرفٍ له رفيف=والنفس يدفعها لهيب اشواقها
من شوفتِك حسيت باعصارٍ عنيف=هز الضماير لين طاح رواقها
كل العيون تهيم بك ياكل طيف=كل العيون وصورتك باحداقها
كلاً تخيّل صورتك حتى الكفيف=يعرف ملامح طلعتِك وإشراقها
وكل القلوب تحب وإبن آدم ضعيف=ياظالمه كلاً يخاف فراقها
الحب مايعرف وضيع ولاشريف=وتخوض فيه الناس حسب اذواقها
اللي عرض حبه على جال الرصيف=سلعه تباع وتشترى باسواقها
واللي ربى قلبه على الحب العفيف=امواج عكس امواج من عشاقها
وحنا تعودنا على الحب النظيف=قطرالمزون إليا لمع براقها
وقلوبنا تبتلّ بالشيّ الخفيف=واحيان يوصلها الظما لإحراقها
لين الزمان ابعد وليفٍ عن وليف=أرواح بين ضروفها واخلاقها
تاهت خطاها في زمن قاسي مخيف=وتعيش ذكرى عطرها وعناقها
صارت كما الأشجار في فصل الخريف=مهما سقيناها تطيح اوراقها


عبدالله.الطلحي